• instagram: twistedmovies
• 12:00 صباحًا - 11 ابريل 2011
• نقد آخر لنفس المستخدم

فيلم الإرهابي انتاج سنة 1994 ومن بطولة النجم المصري الكبير عادل امام , وإخراج الكبير نادر جلال. طبعاً مع الكثير من النجوم الكبيرة التي ساعدت على نجاح هالفلم وهم مصطفى متولي و أحمد راتب وشيرين وحنان شوقي والكثيرين.

الفلم بكل بساطة يتكلم عن الجماعات الإسلامية المتطرفة (الإرهاب) .. وكيفية تأثيره السلبي على المجتمع من جميع النواحي .. وأيضاً تكلم عن نفسية وشعور الإرهابي وطريقة تفكيره.

بلا شك , قصة الفلم تتطور من خلال الأحداث .. ويصير فيها بعض "التويستات" اللي تغير مسار القصة .. وهالشيء اللي ميّز الفلم.

الإخراج عجبني كثير .. طريقة عرضه للأسلحة والملابس والأماكن اللي يعيش او يتجمع فيها الأرهابيين كان شي ممتاز ومتقن .. فيه لقطات كثيرة تشوف فيها الاخراج أكثر من ممتاز .. بصراحة تحية كبيرة للمخرج العظيم .. وأفضل مقطع بالنسبة للإخراج هو [spoiler]مشهد النهاية[/spoiler] بالنسبة لي.

أما عن الموسيقى المستخدمة بالفلم , شي راقي بشكل كبير .. من ابداع الملحن الكبير عمر خيرت .. والله المقطوعة من أجمل ما سمعت من الموسيقى بدون مبالغة .. موسيقى والحان مؤثرة جداً والأفضل من هذا كله انها متناسقة مع الأحداث ..

من مشاهدتي للأفلام الجديدة للنجم عادل امام في الأونة الاخيرة , أشوف انه مستواه تدنى كثير وأدائه نزل وقام يمثل في أي فلم وبدون أي هدف ! .. بالفعل هالكلام صحيح والكثير يوافقوني الرأي .. أما لو تشوف أفلام عادل امام القديمة بصراحة تستمتع بالأداء الممتاز وحتى الشخصية الكوميدية عنده.

مثل ما انتوا شايفين جميع مقومات الفلم الناجح تجتمع في هذا الفلم , وبالتأكيد ما أخفي عليكم بأن هالفلم (قطعة فنية نادرة)

اللي حاب أقوله وان الناس تفهمه , هو أن الأفلام العربية مثل الأفلام الاجنبية .. كلهم أفلام .. وبعض الأفلام العربية قوية وناجحة مثل الأفلام الاجنبية .. ترى مب كل الأفلام فاشلة .. ويمكن هالشيء انا ماكنت مقتنع فيه , وكان عندي تحييز كبير نحو الافلام الأجنبية .. بس الحين وبعد مشاهدة كم من فلم عربي ناجح نظرتي تغيرت تماماً وماتفرق عندي ان كان فلم عربي أو اجنبي .. المهم ان تكون فيه قصة ممتازة وأداء ممثلين راقي وباقي الأشياء من مثل الموسيقى والإخراج.

• 2 مفيد
• 0 غير مفيد