• Ahmed Hosni
• 08:48 صباحًا - 2 يوليو 2017
• نقد آخر لنفس المستخدم

انتهيت أخيرا من مسلسل كفر دلهاب.. رغم إصرار البعض انه يحرقلى المسلسل.. الا انى تجاهلت كل ما كتب عنه تماما واستمتعت جدا بأول حاجه رعب مصري معموله كويس. كلام كتير جدا ممكن يتكتب على المسلسل ده.. اعتقد ان في ناس بالفعل قتلت الموضوع بحثاً وتعليقاً.. رسالة المسلسل واضحة جدا.. هما جملتين بالعدد نستنتج منهم رسالة المؤلف.. - الدم بيجيب دم والظلم بيجيب الخراب.. واحنا اللى بندفع التمن - متقدرش تخرج عن مشيئته.. تقدر تعصاه ممكن.. لكن تخرج عن مشيئتة.. لا في الجملة الأولى اعتقد ان المؤلف يشير الى سلسال الدم الغير منقطع عن طريق دفع الأبناء الأبرياء ثمن جرائم فعلها الإباء.. "احنا" في الجملة دى مقصود بيها الجيل الجديد الغير مذنب في أصل الجريمة.. هي دعوة لوقف الدم كله بغض النظر عن مين البادئ ومين المظلوم.. فقط من أجل حياة أفضل للجيل الجديد. الجملة الثانية جملة فلسفيه ايمانيه.. مش قادر الاقى لها دور حقيقي هادف في سياق السيناريو.. إذا كان الأنسان هيعمل كل شيء في الدنيا ويقول أصل المشيئة كده.. يبقى الانسان مسير لا مخير.. ويبقى كلنا معانا كارت اخضر لأي معاصي في الدنيا طالما شماعة المشيئة موجودة.. وده طبعا مش صح.. الأصل في الأنسان ان عنده حرية الاختيار والا مكانش بقى فى حنه ونار. في النهاية اللى وصلني من المسلسل هي نفس رسالة فيلم الهلفوت.. قصة عرفة مشاوير.. المسكين المظلوم الذي انتهى به الأمر الى ان اصبح ظالم.. ظالم برئ من انتاج المجتمع مش ظالم بطبيعته.. المعالجة المرة دى مختلفة.. يمكن كان رد فعل عرفه مباشر شويه.. المره دى المؤلف بيحذر بقوه من الظلم لأنه هينتج كائن مشوه نفسيا هيحرق اى شيء في طريق انتقامه.. وقد يمتد طريق الانتقام لعشرات السنين.. نفس الجملة قالها حسن الهلالي في فيلم امير الانتقام.. سألته جاريته الأثيرة مالك يا سيدي.. قالها الانتقام يا زمرده.. سلاح ذو حدين.. زى ما أصاب غيرى.. جرح قلبي. طيب المؤلف عاوز ايه؟؟ المظلوم يعنى يسكت ويسيب حقه؟؟ مع كل هذا الكم من الاسقاطات السياسية المطابقة تماما لواقعنا الكئيب.. عاوز تقول لأولياء الدم.. قولوا حسبنا الله ونعم الوكيل وسيبوا ربنا يتصرف علشان متظلموش حد انتو كمان؟؟ لا اعتقد ان المظلوم بيكون على استعداد لسماع كلام زى ده.. المظلوم مش شايف غير حاجتين.. اللى ظلمه.. واللي شافه بيتظلم وسكت.. ايه المبرر لإنسان امتهنت كرامته بالقهر والعجز وقلة الحيلة في غياب كامل من القانون وتجبر من ذوي السلطة عليه انه يكبر دماغه ويقول معلش.. ربنا يجازيهم. لا.. الجزء ده مش منطقي الصراحة.. بالعكس.. في ناس كتير فقدت ايمانها بسبب غياب منظومة العدل في الدنيا.. المظلوم ممكن يعفو اه إذا قدر.. لو القانون يقدر يجيب اللى ضربني متكتف قصادي ويقول ياللا اضربه وخد حقك.. ساعتها بس ممكن أقول خسارة فيه الضرب.. "عفوت" عنه.. لأني وقتها هكون في موقف قوه.. من يملك العفو يملك العقاب.. انما أقول عفا الله عما سلف وانا قفايا وارم من الضرب ومرمى في الحبس؟؟ طيب بأمارة ايه؟؟ وأنهى عفو اللى أقدر امنحه وانا أساسا لا املكه؟؟ المشهد الأخير.. والسؤال المهم جداً هل شهاب الدين بن جلال الدين كتخدا.. هو الشيطان؟؟ لا اعتقد كده بالمره.. في اللحظة دى بس اه.. في شيطان بيتكلم على لسانه.. دى رسالة المؤلف.. المظلوم اللى قرر ياخد حقه بدراعه ومينتظرش اى نصر إلهي وفى طريق انتقامه ظلم ناس تانيه بقي شيطان.. انما من اول المسلسل هو شخص عادى جدا.. مش شايف اى وجه للمقارنه بين كفر دلهاب وونوس. المؤلف عاوز يقولك ان الشيطان هو المحرك الأساسي لعمليات الانتقام.. متسمعش كلامه. منطقياً.. انا مش متقبل الرسالة دى.. بالعكس.. انا في صف الانتقام العنيف جدا من الظالم بأضعاف ما ظلم.. هو البادئ على كل حال وكمان علشان يبقى عبره لغيره.. من أمن العقوبة اساء الادب.. او رفع أسعار البنزين.. كلها واحد. انما المسلسل اجمالا جميل جدا.. اقيمه ب 9 من 10.. يوسف الشريف ماشي بخطى قوية وثابته.. المسلسل يستاهل يتشاف مره كمان.. شيء جميل ان الواحد يحس ان الدراما المصرية لسه قادره تعمل حاجه بعد سنين من فشل صد الغزو السوري التركي الهندي مؤخرا. في الحلقة 24.. الدقيقة 20.. ظهر الفنان (الرائع جدا) محمد رياض قاعد على مكتبة وفى الخلفية خريطة تبدو وكأنها خريطة موقع كفر دلهاب.. لقطت منها كلمة "قره".. الخط عثماني والكلمة نفسها عثمانية اعرف ان معناها "اسود".. الخريطة كمان شكلها قديم جدا.. المشهد ده فجر سؤال فضولي في راسي عن مكان كفر دلهاب وزمن الاحداث. البحث المتعمق عن معنى الجملة.. وجدت ان "قره دكز" بالتركي تعنى الغمام الأسود.. ده الاسم القديم للبحر الأسود.. الاسم نفسه في 3 اقوال عن سبب تسميته.. - القول الأول.. العرب كانوا بيسموا الاتجاهات الأصلية الأربع بالألوان (شمال اسود – شرق اصفر – جنوب احمر – غرب ازرق).. البحر ده شمال ارض العرب فسموه البحر الأسود.. البحر الشمالي يعنى. - القول الثاني هو ان الإبحار في البحر ده كان خطر جدا لأنه شديد الهيجان.. عواصف وأمواج عاتية باستمرار.. فسموه البحر الأسود من حيث مصير ملاحيه.. اى حد يروح هناك مش بيرجع. - القول الثالث.. كثافة السحب الممطرة فوق البحر ده مع الجبال المحيطة بيه وكثافة الطحالب والنباتات في اعماقه بيدي الميه لون غامق يختلف عن كل بحار الدنيا.. في زيارة سابقة لجورجيا عديت على البحر ده.. فعلا الميه تبدو وكأنها زرقاء او رماديه داكنة.. مش فضي او زهري مبهجه زى باقي بحار وأنهار العالم. أكدلى صحة المعلومة كلمة "قره" نفسها.. اعرف من زمان انها اسود بالتركي.. حتى اقسام الشرطة في مصر زمان كان اسمها "قره قول".. التي حرفت الى كراكون.. قره قول هي جمله عثمانية تعنى أصحاب الأزياء السوداء او ذوي البشرة السوداء.. دول اللى هما كانوا الشرطة او العسس في العصر العثماني. البحر الأسود يقع في أسيا الصغرى (الجزء الجنوبي الشرقي من أوروبا).. بيسموه كمان طرابزندة (نسبة الى إقليم طرابزون في تركيا).. هتلاقي روسيا وجورجيا من اليمين.. أوكرانيا ومولدافيا ورومانيا من فوق.. بلغاريا وتركيا من الغرب والجنوب.. بحر صغير مقفول.. يوصل مع بحر مرمره عن طريق مضيق البوسفور.. إسطنبول بتطل عليه في جزئها الشرقي (الاسيوي).. تتميز الطبيعة في المنطقة دى بالجمال الشديد جدا.. امطار غزيره وخضره فوق الوصف.. ارتبط اسمه بالمجد العثماني القديم.. سليمان القانوني وأولاده ذلوا الروس والقرم والقوقاز في البحر ده.. البحر الأسود فضل حكر للملاحة العثمانية فقط لحد سنة 1774م. عملوا بعدها معاهدة كيتشوك كينارجي.. بعدها الأوروبيين بدأوا يبحروا فيه عادى.. كانت الدولة العثمانية بدأت مرحلة الضعف والشيخوخة.. أيام العنفوان كانت قرية كيتشوك كينارجي واقعه تحت الحكم العثماني (هي مكانها الحالي بلغاريا).. وقتها كانت بلغاريا كلها تحت ايد السلطان سليمان.. إذا وجدت العضلات.. فلا مجال لأي معاهدات من أي نوع. عملت زووم على الخريطة.. لقيت مكتوب على الشمال.. افلاق.. بلغاري.. روماني. بلغاري وروماني واضحين.. ايه بقي قصة افلاق دى؟؟ الأفلاق هي لفظه عثمانية أطلقت على أقاليم والاشيا رومانيا القديمة الثلاثة (والاشيا – مولدوفيا – ترانسلفانيا).. والاشيا معرفوه عن طريق فلاد الوالاشي (فلاد الثالث او فلاد المخوزق).. اللى هو احنا نعرفه باسم دراكولا.. الحاكم الروماني البشع اللى اتهزم شر هزيمة على يد السلطان محمد . الفاتح. الخريطه مكتوبه بالعثماني.. في وقت كانت فيه بلغاريا ورومانيا تحت سيطرة العثمانيين.. يبقى كده عرفنا مكان كفر دلهاب.. وزمن الأحداث كان في القرن ال 14 او ال 15.. باين طبعا من الأسلحة والأزياء واتساع الدولة العثمانية. هي دى أرض القوقاز او الترك او التتر.. ينحدر من الأرض دى المماليك اللى دخلوا مصر في فترة زمنية سابقة لأحداث المسلسل وأقاموا فيها دولة قوية استمرت 250 سنة انتهت بالهزيمة امام الأتراك. مسلسل جميل مليان تفاصيل حلوه.. الموسيقى التصويرية وأماكن التصوير والإضاءة والأزياء فوق الممتازة.. القصة فكرة يوسف الشريف نفسه.. الحبكة والسيناريو والحوار لعمرو سمير عاطف في ثالث تعاون مع يوسف الشريف بعد رقم مجهول والصياد. حد خد باله ان الخريطه الموجودة خلف محمد رياض دى تشبه اوى الخريطه الموجودة في قصر الاتحادية؟ المؤلف مثلا عاوز يقول ان شيخ الغفر الظالم ده.. هو نفس الحاكم الظالم الموجود حاليا عندنا؟؟ لا لا.. اكيد بيهزر.. عاوزين نربى العيال.

• 3 مفيد
• 1 غير مفيد