• دعاء أبو الضياء
• 12:00 صباحًا - 29 اكتوبر 2012
• نقد آخر لنفس المستخدم

بصراحة مش لاقية اي كلام أقوله على فيلم عبده موته، مش عشان الفيلم سيء للدرجة دي وإنما علشان انا خرجت من السينما وانا مش فاهمة اي حاجة، خاصة لما لقيت كل الناس حوليا معجبة بالفيلم وبتردد وتغني أغنية بوسي والليثي وكأن الفيلم ترك بصمة قوية في عقول الجمهور، وأثر فيهم،

لا اعتقد أن المشكلة عند السبكي، وبالعكس تماما أنا بحترم الراجل ده جدا لانه ببساطة اوي تاجر وعايز يدور فلوسه في السوق بدون أي فلسفة ولا كلام الفنانين بتوع "الفن رسالة وبنوصلها"، وبالتالي بيشوف ايه اللي بيعجب الجمهور المصري وبيقدمه، فلا غبار عليه؛ المشكلة كلها بتكمن في الفنانين والممثلين اللي قبلوا يقدموا اسفاف زي ده، والمصيبة الأكبر اني لغاية دلوقتي مش مصدقة أن الممثل محمد رمضان واللي كان أملي فيه كبير أنه ينحط بمستواه الفني بالشكل دا، وأنه يحرق نفسه لأربع سنين قدام ع الأقل خاصة أنه قدم من شهور قليلة نفس شخصية البلطجي وتاجر المخدرات عبده عندما قام ببطولة فيلم الألماني للمخرج علاء الشريف، وهكذا الممثلة رحاب الجمل اللي كنت بشوف فيها موهبة وتميز غير عادي، أما بالنسبة للست الراقصة (دينا) فمحدش يقدر يقول عليها حاجة لأنها ببساطة راقصة وده مش جديد عليها بتقدم فن معين هي شيفاه كدا فتحياتي لها، بس احب اقولها إن المطربة بوسي تفوقت عليها وانصحها بعدم الدخول معها في أغنية أخرى

وبدون حرق القصة اللي محروقة لوحدها؛ لان اللي شاف فيلم الألماني ح يفهم كويس الفيلم بيدور عن ايه، أو حتى اللي شاف الاعلان كفاية عليه يفهم، لكن الكلام كله ع المشاهد الكوبي وبست اللي مأخوذة عن فيلم الألماني زي أغنية أوكا واورتيجا في الحارة ورقص عبده موتة بالكزلك والسنجة، كمان مشاهد الجنس والسرير والإيحاءات المستفزة اللي قدمها السيناريست محمد سمير مبروك نسخة طبق الأصل من فيلم الألماني.

تحياتي للسبكي وأهنيئه على الربح المؤكد والكبير، ولا عزاء لأي ممثل شارك في هذا العمل.

• 23 مفيد
• 5 غير مفيد