• Mahmoud Mahdy
• 12:00 صباحًا - 15 سبتمبر 2014
• نقد آخر لنفس المستخدم

Luc Besson المخرج الفرنسي، اللي أخرج قبل كدة Leon The Professional و The Fifth Element و Angel A و مؤخراً The Family هو اللي أخرج الفيلم وألف السيناريو بتاعه كمان لأنه أيضاً سيناريست وكتب قبل كدة كل الأفلام اللي ذكرتها دي بالإضافة لـTaken وThe Transporter وColombiana وFrom Paris with Love. يعني دة صانع أفلام تقيل ومش عادي.

الفيلم كمان منتج مش عادي، وليه شوية سمات غير تقليدية. منها مثلاً اللجوء لمشاهد تسجيلية مالهاش دعوة بالفيلم عشان يشرح أو يصور المواقف اللي بتحصل. ومن الواضح إن Luc Besson زهق من التكنيك دة رغم إستخدامه بكثافة في البداية.

بس أهم سمة وأفضل سمة في الفيلم هي الإيقاع. فوق الممتاز، استغلال مثالي لزمن الفيلم في تقديم شخصياته وتعقيداته. مابتلحقش تزهق من حاجة رغم إن الفيلم بيبطأ سرعته في أوقات كتير لكنها أوقات تستاهل ولحظات متميزة.

أكتر مشاعر عكسها عمرو واكد هي الخوف من تطور Lucy وقدراتها وعمل دة كويس. بس أنا مش مبسوط إنه ماعملش غير دة تقريباً رغم إنه أنهى مشاهده في الفيلم بشكل كويس جداً. أكتر حاجة بسطاني إن أساس إختياره للدور مش لغوي ولا جغرافي .. Luc Besson كان عاوز حد جديد وإختيار عمرو واكد كان مظبوط.

Lucy منتج غير تقليدي وفيه لحظات جيدة كتير. بدايته ممتازة بس الدنيا بتنحدر بشكل مستمر بعد كدة. رؤيته مش واضحة وشخصياته متقدمة كويس وبتتطور كويس وأهدافهم مشروحة .. ماعدا شخصية Lucy ودة كان ممكن يبقى شيء مقبول ويعدي لولا بس أن الفيلم اسمه Lucy. بس عموماً ذنب الفيلم اللي لا يغتفر هو كتر المحاضرات والدروس. ودة بيخلي أفلام ينفع يتقارن بيها زي Transcendence وLimitless يتفوقوا عليه في أحيان كتير ودة شيء وحش جداً لإن دي أصلاً أفلام مش حلوة قوي.

• 4 مفيد
• 1 غير مفيد