• Fady Baha'i Seleem
• 12:00 صباحًا - 9 يناير 2010
• نقد آخر لنفس المستخدم

واضح ان رامز جلال حكايتة حكاية!

الواد دمه خفيف جدا..بشكل نادرا ما تصادفه فى حياتك العادية..

و مع ذلك..

افلامه فاااااااشلة بطريقة فظيعة!!

ايه يا بنى كل الفشل و الاعاقة اللى انت فيها دى؟ ليه انت فاشل كدة؟

معروف طبعا ان "احلام الفتى الطائش" (فشل فشلا ذريعا (او خلينا نقول اخد المركر الـ13 مثلا.)

شبه منحرف بقى..

اولا: رامز جلال بيشتغل شغلانة نادرة الوجود..بس موجودة..الا و هى طبيب تجميل سيارات..و هى وظيفة تجمع مابين الميكانيكى و السمكرى و الاستورجى! (بس لازم يكون شاب ستايل و روش و دماغه مطرقعة..ده فى الواقع..مش فى الفيلم بس.)

إدوارد..

إدوارد..جاى يستهبل الشويتين بتوعه و "يتعكم"..و يخلع!

القصة..

مصيبة!

3 مؤلفين..2 منهم..يعتبروا من (عتاولة) الكتابة الكوميدية..سامح سر الختم (صاحب معظم نجاحات محمد سعد)..و وليد يوسف..(صاحب اهم مسلسلات محمد صبحى..سداسية "ونيس" و مؤلف "ثلاثية "الدالى"))..و واحد اسمه محمد النبوى..مين محمد النبوى..الله اعلم!..داخلين فى فيلم واحد..و مع ذلك..الفيلم فاشل طحن!..

فاشل فشلا "باهرا"..

لا قصة..و لا حبكة..و لا بناء درامى..و لا كوميديا موقف..و لا افيهات جامدة..و لا نجوم..و لا حتى مشاهد رومانسية..(اعنى التى تهم المراهقين..كوميديا نظيفة..بتبرق!!!)

اعتمد هذا المخرج (المعوق)..وليد محمود على 3 مهرجين..3 بلياتشوهات..علشان يشحت ضحك بأى ثمن..و مع ذلك لا حياة لمن تنادى..كالذى بيآذن فى "قبرص"!!

افيهااات باااااايخة..حوار اااااهبل..مرتجل..مصطنع..متفبرك..وليداللحظة..سخيف..ثقيل الظل جدا..

كثير من التعليقات و الديالوجات (المفترض قال ايه انها كوميدية) تصلح لان تضحكك فعلا..بس

لو اتقالت فى فيلم معمول سنة 1997 مثلا..مش سنة 2008!!!

و بعدين مين زينة دى اصلا؟؟

تخش فيلم لأحمد عز تلاقيها..مع تامر حسنى تلاقيها..مع محمد سعد تلاقيها..مع رامز جلال تلاقيها..الله!..دى ناقص تمثل مع احمد السقا و كريم عبد العزيز كمان!!

يا جماعة..رخمة..عديمة الجمال..غلسة..سخيفة..بايخة..عتيــــــــتة! لكن خلينا محايدين..

فى الفيلم ده.. نتكلم عنها فى هذا الفيلم..

فى هذا الفيلم.. ماكانش ليها لا لون و لا طعم و لا ريحة!!!

على العموم..اهى جات تهرج هى الاخرى..

الحاج غسان مسعود..صاحب التاريخ الكبير فى افلام السبعينيات..و مسلاسلات التسعينيات التاريخية و الدينية!!! (شوفوا من ايه لإيه!!!!)..جاى طبعا..يمرن بقه..و يشغل حنجرته..و يجعر و يصهل و يملأ السينما زئيرا و صياحا..غسان بقى..اداء ضعــــيف..يشبه اداء سمير غانم فى مسرحياته الاخيرة..بواخة..تلامة..ايه ده؟

رضا ادريس..عبد الله مشرف..و سعادة الباشا..رضا حامد..اللى فجأة لاقيناه من 4 او 5 سنين بيقدم برنامج 30 حلقة لمدة سنتين..فى توقيت متميز جدا..فى رمضان 2002 و رمضان 2003..ليه يعنى؟..قال البرنامج بتاعه جامد!!!..مرة لاقيته بطل مسلسل 30 حلقة قصاد تيسير فهمى فى القناة التالتة!!!..كل ده على ايه..علشان ممكن يكلمك بطريقة لا يفهم منها حرفا..شوف الذكاء الشديد؟؟!..صباح الخير يا منغوليا يعنى!!!

الناس اللى زى الحاج عبد الله مشرف و رضا حامد..دول ناس ماتوا فنيا..اكلينيكيا ميتين!!!

و رضا ادريس..عند امكانيات..بس محروق شوية..عايز مؤلف نضيف و مخرج بجد..علشان ممكن يخليه ينطق..بدل التهتهة السينمائية اللى عايش فيها بقاله 7 او 8 سنين دى..و اللى بيسيتظرف بيها علينا دى!

حسن حسنى..

خلاص بقى..عم حسن..عايز يشتغل بأى تمن و بشكل مستمر..اى كان الفيلم..عايز يشتغل..يشتغل..يشتغل! و بيخش فى افلام..وحشة..سيئة..فاشلة..ضايعة..ده اشتغل 9 افلام فى 2005 لوحدها! فيه كدة؟ مين عملها دى فى تاريخ السينما العربية؟ ممكن سعيد صالح مثلا!!!

على العموم دى السلمة الاولى فى الهبوط الفنى الدرامى (المؤلم و المذل!)..و قريب هايقعد فى البيت و ماحدش هايكلمه اصلا!!! خليه يقضيها بقى سوبر هنيدى..و عالم زبديات..خبير فى قواعد الزبدة..

استنى..استنى..انا ماطلعتش!!

الديكور..فاشل..ممكن يكون متاخد فى استديو الاهرام..او استديو جلال..و احتمال ستديو ناصيبيان..او ممكن فى شقة مفروشة..و ممك فى ستديو 3 بتاع القناة التالتة..ليه لاء؟

اللبس و الاكسسوارات..رامز جلال جايبها من محل ملابس اطفال من دبى..او من جدة مثلا..او من اصدقاءه فى سيرك لندن!

التصوير..

تصوير؟ تصوير ايه؟ انت مش بتعرف تصور يا بنى؟ آه و النبى يابا الحاج..طيب ما تيجى تصور لنا؟..تتصور..بحبك؟

بس كدة..ادى التصوير!

الموسيقى..

انا اخر حاجة فاكرها فى الابتكار الفنى اللى اسمه الموسيقى التصويرية..الاغنية الراب اللى غناها رامز فى اول الفيلم..يعنى الموسيقى كانت مغطية على صوته..و الاغنية التانية..نشرة الاخبار..يعنى لو ماضحكتش..حاول ترقص عليها..و لم مارقصتش عليها..حاول تتجاهلها..بس هاتلاقيها طويلة..ساعتها..ممكن تروح التواليت..او تتطلع الموبايل و تتصل بماما او ببابا او بمراتك او خطيبتك..و تكلمهم بصوت عالى..او اقعد مع نفسك الحبة دول و افتكر المعاصى و الذنوب بتاعتك..

الاخراج بقى..

اووووووووووووووووووووووووووه..المخرج العالمى الكبير..الاستاذ..الدكتور..المهندس..اللواء.. ولــــــيــــــد محمـــــود..اوووه ماى جاد!..وليد محمود شخصيا؟..

غالبا..هو ده الجدع اللى بيطلع فى اعلانات ميلودى تريكس..واد ضعيف ملُة..و بيكسب كتير فحت..و بيخرج هذا الفيلم الاسطورى!..

عاش يا رجالة..

البوستر..غبى طبعا..

الشئ الايجابى الوحيد فى هذا الفيلم..العربيات المدندشة و الملونة..شكلها لذيذ..تشبه بتاعة التيلى ماتش..بتاع برنامج دنيا الاطفال..اللى كان بيطلع يوم الجمعة زمااااان..

التقدير الإجمالى: 4.5 من 10

• 3 مفيد
• 1 غير مفيد