• دعاء أبو الضياء
• 12:00 صباحًا - 8 سبتمبر 2012
• نقد آخر لنفس المستخدم

لما اتفرجت على إعلان فيلم (إرث بورن) وعرفت القصة بتدور في إطار ايه مكنتش مشتاقة أوي إني أتابعه؛ ولقيت أن زيه زي أي قصة قدمتها هوليوود قبل كدا، عميل سري بالمخابرات المركزية الأمريكية اكتشف مخالفات وأسرار مهمة فصدر قرار بتصفيته واغتياله، تقريبا دي قصة فيلم أرث بورن مع اختلاف بسيط في إن الأسرار عبارة عن تجارب علمية بتم على البشر.

لكن في النهاية قررت أشاهد الفيلم يمكن اخرج بأي فكرة جديدة بيقدمها الأخوان جيلروي عن المعتاد، وبالفعل خرجت بأشياء لكنها قليلة جدا عن اللي كنت متوقعاه ويمكن ده اللي خلاني مهتمش بأخر خمس دقايق من الفيلم.

فمثلا أكتر حاجة عجبتني بالفيلم الموسيقى التصويرية اللي كانت مناسبة جدا للأحداث وخدمتها بطريقة مباشرة وقدرت من خلالها أعيش حالة الترقب والخطر اللي كان فيهم جيرمي رينر طوال الأحداث، كذلك المطاردات نفذت بطريقة أبهرتني بالرغم من تكرارها في كل مشهد وكنت بحاول أخد نفس مع كل مشهد علشان أقدر أكمل اللي ح يحصل بعد كدا، أيضا الحوار بين الأبطال كان شيق ومثير،

وبالرغم من كل ده جاء دور راشيل وايز ليكون أكتر الحاجات اللي استفزتني فطول أحداث الفيلم ردود أفعال راشيل غريبة وكانت أميل للبرود بالرغم من أنها كانت بتتحط في مواقف صعبة بتتطلب رد فعل مؤثر وحرك اكتر من كدا وده اللي خلاني اعتقد إنه يمكن شخصية الطبيبة مارتا عندها برود في الأعصاب مثلا أو زي ما بيقولوا "المخرج عايز كدا".

أما جيريمي رينر فهو ممثل موهوب بلا شك وتعبيرات وجهه أكتر حاجة بتميزه وتقدر تفهم منها حاجات كتير أوي واعتقد إنه قدر يقدم شخصية جيسون بورن بطريقة مميزة وخلاها مثيرة للاهتمام بالرغم من تشابهها مع كثير من الشخصيات الي قدمت في أعمال فنية مماثلة.

الفيلم مايستحقش إن الواحد يشوفه أكتر من مرة وأحداثه كلها متشابهة ومكررة واعتقد إنك ح تنساه أول ماتخرج من باب السينما.

• 2 مفيد
• 2 غير مفيد