موعد مع الموت

موعد على العشاء فيلم بيجسد عبث الموت، ومع توحد خان مع الواقعية، لدرجة إن غصب عنه الفيلم خرج برة إطار التمثيل ليصل لجوهر الموضوع وهو الموت وبالتحديد عبث الموت ويتجسد ذلك ويوضح بعد عشرين سنة من إنتاج الفيلم.

في الدقيقة 1:16:00 وبعد مشهد ضرب أحمد زكي في المحل، خان وحبه للشارع وللقصص المجاورة للقصة الرئيسية، وتأكيد على عبث الحياة قبل الموت، تشوف سعاد مشهد واحدة بتقع من البلكونة وبتقاوم السقوط وسط تجمع الناس الأقرب للحقيقة منه لمشهد سينمائي.

تكملة للمشهد في الدقيقة اللي بعدها وسط مشهد الصدمة وخضتها على ما جرى لأحمد زكي بتسمع صوت صويت بيدل على سقوط الست من البلكونة وفشل محاولات انقاذها.

وبعد حوالي 6 دقايق من المشهد السابق ودخول مشاهد كتير مهمة في السياق الفعلي لقصة الفيلم، بتظهر الست اللي كانت متعلقة وهي بتقع كتكملة للمشهد السابق وتأكيد على الصوت اللي سمعته، ولكن دة بيظهر في حلم سعاد حسني وبتقوم مفزوعة، كتأكيد من خان إن الموت مش فعل لحظي، لكنه فعل ممتدد التأثير.

وفي عملية تواطؤ واضحة بين عبث الحياة وعبث الموت، تموت سعاد حسني في الحقيقة بعد هذا المشهد بحوالي 20 عام بطريقة قريبة جدًا من موت الست في حلم سعاد في موعد على العشاء وبالأخص في شكل سقطوها على الأرض.

وخضة سعاد من الكابوس وتخبطك وأنت بتشوف المشهد دة بعد موت سعاد في الحقيقة، هي بتتخض عشان المشهد عاوز كدة ولا عشان بتشوف مشهد موتها ويدخل تورطك الشخصي مع الواقع في تورطك في الفيلم.

تكتمل عبث الفيلم في مشهد اللي أصر فيه أحمد زكي النوم في تلاجة الموتى في المشرحة، وتدخل سعاد حسني وهو نائم في التلاجة ومقفولة علية وتفتح ليخرج كما يحدث في الحقيقة بدون أي تدخل سينمائي.

زكي بيحب العند مع خان، ولأن خان بيحب الواقعية، كان لازم زكي يزايد عليه فيها، ويأكد ماحدش مجنون تمثيل وواقعية أكتر مني حتى لو صاحبي خان، ومع اصرار زكي كان لازم يوافق خان.

ويحكي زكي إنه شاف يومها دم كتير وقت تهجيز التلاجة وإنهم شالوا موتى من بعض التلاجات، وإن أغلب من وراء الكاميرا خرجوا بره المكان تماما وقت تصوير المشهد، وأن المنتج روح يوم تصوير هذا المشهد، وإنه نام بالفعل في التلاجة للحظات حتى تفتح أمام سعاد وتقفل عليه برده في نفس المشهد، وإنه حصله بعض الأصابات في جسمه بسبب المشهد دة.

وطبعا النهاية والموت لكل أطراف المعادلة، والرجوع للصور الفرح القديمة لسعاد حسني وحسين فهمي تأكيد على إن الموت فعل صالح للماضي والحاضر والمستقبل.

  • هو الأكل دة فيه حاجة؟

  • آه، فيه سم......

نقد آخر لفيلم موعد على العشاء

عنوان النقد اسم المستخدم هل النقد مفيد؟ تاريخ النشر
c'est un film sérieuse et belle omar achraf omar achraf 0/4 22 ديسمبر 2008
عندما تتكلم الصورة ...... أحمد أبوالسعود أحمد أبوالسعود 6/6 24 فبراير 2010
ابداع محمد خان واحمد زكي حربي الخولي حربي الخولي 3/4 31 مايو 2009
موعد مع الموت Sherif Hassan Sherif Hassan 0/0 23 يونيو 2016