• دعاء أبو الضياء
• 12:00 صباحًا - 27 يناير 2013
• نقد آخر لنفس المستخدم

تقريبا بعد ما يقرب من ثسع سنوات أو أكتر بيعود الممثل (ارنولد شوارزينجر) للسينما والظهور كبطل من خلال فيلمه (The Last Stand) أو الصمود الأخير كما يطلق عليه، وبعد ظهوره كممثل مساعد بفيلم (The Expendables ) بالجزء الأول والثاني، ومع إني كنت متوقعة إن أرنولد مش هيقدم أي جديد بالفيلم وإنه هيبقى نسخة مكررة من جميع أفلامه بمعنى أصح هيعتمد بشكل كبير على المعارك والمطاردات؛ إلا إن حدسي كان في غير محله،

فأولا قصة الفيلم جديدة ومافتكرش إنها اتقدمت قبل كدا، وأهم ما يميزها الحبكات الدرامية اللي قدمها المؤلف (اندرو كنوير) في السيناريو اللي أخرجه (جي وون كيم) خاصة في ربط أحداث بعيدة عن بعضها، زي مثلا اكتشاف مقتل العجوز صاحب الأرض اللي كانت الأمل الوحيد في هروب المسجون (كورتز)، أيضا فكرة الدفع بالعميلة (إيلين) وكشف هوايتها بمشاهد النهاية وإنك تفضل طول الوقت بتشك فيها، وغيرها من الحبكات الدرامية اللي ساعدت وتيرة الفيلم وسرعة الأحداث في جعلها منطقية وغير مبالغ فيها، ويمكن تفضل طول الوقت مشدود وبتسأل نفسك سؤال واحد هو ايه اللي هيحصل بعد كدا؟

وطوال الاحداث ماكنتش حاسة بأي افتعال أو صنعة في تمثيل أرنولد لغاية ما أوشك مشهد النهاية على الانتهاء؛ هنا بس حسيت بإن في حاجة غلط خاصة لما اعتمد ارنولد على عضلاته وكإنه شاب في الثلاثين من عمره، ويمكن المخرج وون كيم معتمدش في أغلب المشاهد إن ماكنش كلها على المعارك وكان اعتماده فيها على مطاردة السيارات وإطلاق الرصاص ويمكن ده خلى للفيلم معنى حقيقي بعيدا عن التزيف والاستخفاف بعقول الجمهور، أو افتعال أن ممكن أرنولد في مثل هذا السن يؤدي كل الحركات دي وكإنه شيء طبيعي جدا.

الفيلم جيد ويستحق 7/10 واعتقد إنه يسمح بمشاهدته لما أقل من 17 سنة لعدم احتوائه على عنف أو ألفاظ خارجة بشكل مبالغ فيه.

• 4 مفيد
• 0 غير مفيد