• دعاء أبو الضياء
• 12:00 صباحًا - 1 اكتوبر 2012
• نقد آخر لنفس المستخدم

من العادي إننا نلاقي أفلام الدراما الاجتماعية بتحاكي الواقع وبتناقش مشاكل اجتماعية مهمة في حياتنا، لكن لما يكون ده هو البناء الدرامي الأساسي في أفلام الرسوم المتحركة يبقى نقدر نقول أن الفيلم بيقدم فكرة جادة ومحترمة تستحق الاهتمام.

فمثلا بنشوف الفيلم بيتناول مشكلة اﻹفراط الشديد في الحماية وخوف الأباء على الأبناء وعلاقتهم ببعض، وإزاي ده أدى إلى مشاكل كبيرة من خلال حكاية السمكة نيمو اللي بيحاول يهرب من القيود العتيقة اللي فرضها عليه والده، كمان بنقدر نلاحظ أد إيه الفيلم بيثير المشاعر والعاطفة ناحية نيمو وتطلعه لإثبات نفسه، والشفقة لحالة اﻷب اللي من السهل تنزل دموعك معها، أيضا فكرة تصوير ما يحدث في المدرسة وجعل الأسماك يتصرفون كما يحدث مع الأطفال أمر غاية في البراعة تحسب للمؤلف والمخرج اندرو ستانتون، كذلك علاقة الصداقة اللي نشأت بين نيمو ودوري كانت من أكثر العلاقات الجيدة اللي بيبان معها أد ايه الوفاء والإخلاص بين الأصدقاء.

تميز كل شخصية في الفيلم كانت من أبهر الخطوط المرسومة بدقة، فشخصية نيمو كانت بتقدم الطفل المشاكس الطموح المتمرد على القيود، وشخصية دوري تناولت وفاء الأصدقاء وكانت مرحة وفكاهية جدا خاصة فكرة جعلها تفقد الذاكرة القريبة ساعد أكتر على تقديم مشاهد كوميدية، كذلك شخصية الأب مارلن،

واعتقد إن براعة المخرج ظهرت أكتر في المشاهد اللي ضاع فيها نيمو وسط البحار والمحيطات والمغامرات اللي قام بها، والحرفية تمثلت في اﻷلوان الجميلة اللي قدمها تحت المياه والشخصيات البحرية الشيقة اللي قابلها نيمو في رحلته.

فكرة تقديم الفيلم تاني بخاصية ثلاثي اﻷبعاد اعتقد إنها فكرة جيدة وح تلاقي إقبال كبير اوي خاصة إن الفيلم بيدور في عالم البحار وده في حد ذاته بيظهر التقنية العالية اللي بالفيلم.

• 0 مفيد
• 0 غير مفيد