• دعاء أبو الضياء
• 12:00 صباحًا - 26 يناير 2013
• نقد آخر لنفس المستخدم

للمرة التانية بيجازف فيها أحمد عز بفيلمه وينزل بيه ويصر على عرضه في وقت مش مناسب، خاصة مع الأحداث اللي بتحصل دلوقتي في البلد، وكإنه متعلمش الدرس لما قدم فيلمه (365 يوم سعادة) بنفس التوقيت عام 2011 واللي للاسف ملاقش النجاح اللي كان متوقعه بغض النظر عن كونه ناجح فنيا أو لا،

ومع إني بشوف أن أحمد عز بيليق عليه أكتر الأدوار الرومانسية إلا إنه بفيلم الحفلة حسيت أنه قدم دوره بشكل جيد، خاصة إنه ماكنش البطل الأساسي بالفيلم أو نقدر نقول إن البطولة ماكنتش مطلقة لممثل واحد؛ بل شاركه فيها الممثل محمد رجب وكان مساحة دوره أكبر من مساحة عز، واعتقد أن رجب تفوق كثيرا على نفسه بهذا الدور بالرغم من رسم الشخصية المستفز اللي رسمها المؤلف وائل عبدالله خاصة الشنب اللي كان شيله رجب على وشه طوال الفيلم وفكرني معاه بدور أحمد زكي بفيلم (زوجة رجل مهم) وفضلت أضحك كتير لإن مافيش ضابط شرطة دلوقتي بيخلي شنبه كدا، ويمكن ده كان سبب جانبي مع عدد من الافيهات الكوميدية قدمه رجب خلاني اشوفه بشكل كوميدي وابعد التفكير شوية عن شخصيته،

أما بالنسبة للبطولة النسائية بالفيلم فاعتقد إنها كانت من نصيب الفنانة جومانا مراد اللي قدرت ببراعة في تقديم شخصية مستغلة لأبعد الحدود، في الوقت اللي كل الناس كانت فاكرة إن روربي هي بطلة الفيلم ، ولكن لم يتعدى دورها نفس مساحة الممثلة دينا الشريبني وسارة شاهين،

أحداث الفيلم بتدور في إطار بوليسي بعيدا عن جو الأكشن والحركة حيث تخطف زوجة رجل أعمال ويتولى محقق المباحث (فاروق) بالتحري عن الأمر والتحقيق في ملابسات الحادث؛ ومن هنا أقدر أقول أن الأحداث طوال الوقت كانت هادئة ومشاهد العنف قليلة جدا ويمكن كانت سبب في خلق جو من التشويق نوعا ما في محاولة للتنبؤ بالأحداث، مع ضيق الحبكات الدرامية وسلقها في بعض المشاهد.

أغلب المشاهد كان تصويرها في أماكن محدودة زي مول العرب ومحطة مترو الأنفاق، وبعض الأماكن المغلقة وبمكن ده زاد شوية من حالة الملل؛ بس اعتقد أن السيناريو ماكنش هيخرج عن هذه الأماكن وماكنش متطلب التصوير في أماكن خارجية أكتر من كدا،

الفيلم قصتة مقبولة والتتابع السردي بسيط ومش هتحتاج مجهود أو تركيز في أحداثه، واعتقد أنه فيلم عائلي من الدرجة الأولى لعدم احتوائه على أي ألفاظ أو مشاهد خارجة أو عنف.

• 9 مفيد
• 3 غير مفيد