• دعاء أبو الضياء
• 12:00 صباحًا - 19 سبتمبر 2013
• نقد آخر لنفس المستخدم

فيلم رعب تاني .... طب يارب المرة دي يبقى فيلم يستحق إني أضيع فيه وقتي وفلوسي، ويارب أخرج منه بأي فايدة حتى لو صغيرة،،، خاصة إن كتير من أفلام الرعب من الصعب إنها ترضيني بسهولة، كل ده وأكتر كان في تفكيري أول ما عرفت إن في فيلم اسمه (The Conjuring) سيتم عرضه في السينمات، ومع التعرف على أبطال الفيلم واكتشاف إن الممثل (باتريك ويلسون) ضمن أبطاله افتكرت على طول أدائه في فيلم (Insidious) واللي بصراحة أبهرني جدا بطريقته وتمكنه من تقديم دور الأب اللي بيحاول إنقاذ عائلته من الأشباح بعد انتقالهم إلى منزل جديد.

في البداية قرأيت قصة الفيلم، وشوفت الإعلان وقولت تمام كدا "زيه زي أي فيلم رعب" ... إذاً القصة تقليدية ومافهاش أي جديد يذكر (مهروسة في عشروميت فيلم قبل كدا)، حيث أسرة تنتقل إلى منزل جديد ويفاجأ الجميع أنه مسكون بالأشباح ويبدأون في الاستعانة بأحد الأشخاص لمساعدتهم في طردها والتغلب عليها.... لكن مع أول مشهد للفيلم حسيت باختلاف كبير، وإن في حاجة جديدة هيقدمها المخرج (جيمس وان) اللي تميز بتقديم أفلام الرعب والإثارة زي (Saw)، و(Insidious)؛ واعتقد أن حدسي كان في محله

الأخوان (هايز) قاموا بوضع سيناريو محبك يصنع معه الخوف في كل مشهد، واستكمله جيمس واين بمجموعة من المؤثرات الصوتية واﻹضاءة الخافتة المناسبة والمرعبة باﻹضافة إلى أنه ترك الجمهور يرعب نفسه بنفسه معتمدا بذكاء على إسلوب نهايات المشاهد المفتوحة وليس على إسلوب الخضة اللي بتمتاز بيها جميع أفلام الرعب، ناقلا لك صورة عن حالة أسرة معذبة ويكاد يوهمك بأنها حقيقية لبراعته في إدارة الأبطال خاصة الأطفال؛ وده يمكن اللي هيخلي أداء (باتريك ويلسون) يجي في المرتبة الثانية لو اتكلمت عن أداء الممثلين، أو لا يقلوا عن أدائه إذا وجدت المقارنة، أيضا دور فيرا فارميجا واللي ادت دور محققة الخوارق الطبعية مع زوجها واستخدامها لكل عواطفها في التعبير عن الشخصية واحساسها بالأشباح

أما بالنسبة للموسيقى التصويرية واللي كانت البطل الرئيسي في العمل فاعتقد إنها كانت مناسبة جدا لأحداث الفيلم؛ وإنها عبرت عن الحالة النفسية للأبطال، ونلاحظ ده أكتر في بعض المشاهد اللي كانت الموسيقى فيها بسيطة والصوت منخفض بشكل واضح وكأن المخرج أراد أن يجعل الصوت بالشكل ده استكمالا للإضاءة الخافتة بالفيلم لإضافة إثارة ورعب أكثر أيضا المكياج وتنفيذ ظهور الأشباح كان منفذ بشكل دقيق، ودون أي مبالغة في تقديمه وكان فيه احترام لعقلية الجمهور

للفيلم المصنوع ببراعة شديدة واعتقد أنه يستحق فعلا 8/10 في تقديري لاستكمال جميع عوامل النجاح

• 7 مفيد
• 0 غير مفيد