• دعاء أبو الضياء
• 12:00 صباحًا - 23 سبتمبر 2013
• نقد آخر لنفس المستخدم

أفلام سباق العربيات، والبرامج اللي بتتناول نفس الفكرة وبتقدم سباقات عالمية ماليش ميل ليها أوي.. حتى ألعاب الفيديو جيم اللي في نفس الإطار مش بحبها ودايما مش بوصل فيها غير للمستوى الأول، أو التاني بالكتير،،، وده مش معناه أني مش بتفرج على نوعية الأفلام دي إنما مش بفضلها بشكل كبير.... وعشان الناس متفتكرش إن فيلم (Getaway) بيدور عن تلك المسابقة يجب التنويه عن إن قصة الفيلم تتلخص في متسابق متقاعد برنت (إيثان هوك) يتم خطف زوجته بطريقة غامضة ويضع مختطفها شرطا غريبا لعودتها بأن يجعل الشرطة تطارد برنت طوال أحداث الفيلم وعليه الهروب في كل مرة حتى يكتشف برنت حقيقة الأمر في النهاية... إذاً مافيش صلة بين هذه السباقات والفيلم غير إنها كانت الوظيفة السابقة لبطل العمل.

ومبدائيا كدا القصة غريبة جدا وبالرغم من ده مالاقتش فيها أي متعة، إو إنجذاب خاصة مع تكرار مشاهد المطاردات طوال مدة الفيلم وتشابهها بشكل كبير، واللي زاد معاها حالة الممل والسأمة مع إن اللقطات كانت سريعة؛ ولولا إني قررت أشاهد الفيلم لأخر مشهد كنت جريته واتفرجت على مشهد النهاية وخلصت!.... أما بالنسبة لتنفيذ العمل أقدر أقول إنه كان ممكن تنفيذه بشكل أفضل خاصة إن مشاهد المطاردات بانت إنها مجرد مشاهد تعقب ومراقبة لشخص أو سيارة من قبل رجال الشرطة، والسؤال اللي كان بيطرح نفسه طول الوقت (هي عربية برنت ليه مش بتتكسر ولا بيحصلها حاجة؟؟؟؟؟ مع إن عربيات الشرطة كلها بتتكسر وبتتقلب) يظهر إن المخرج عايز كدا ! ولما اكتشفت إنه تم تحطيم 130 سيارة خلال تصوير الفيلم، وإن جميع مشاهد التصادم وتحطم السيارات حقيقة (حسيت إني أنا اللي فوتوشوب)، ده غير العديد من الأسئلة اللي ملهاش أي إجابة فمثلا إزاي الشخص المجهول بيحدثه داخل السيارة من خلال كاميرات مراقبة ومش بيسمع اتفاق برنت مع كيد ؟؟!! وايه الفكرة من إنه يدفع ببرنت نفسه للحصول على الفلاشة اللي عليها المعلومات!!

ولو تحدثنا عن الأداء التمثيلي فحدث ولا حرج فأداء إيثان هوك غير مقنع بالمرة ، وحسيت مع أنفعالاته وردود أفعاله بالامبالاة الشديدة مع إنه البطل اللي زوجته اتخطفت والمفروض يبقى شعوره غير كدا خالص، حتى في المشاهد اللي كان بيوصف فيها مشاعره لكيد (سيلينا جوميز) اللي المفروض هي الأخرى يبقى تعبيرها مختلف تماما مع تعرضها لمواقف خطيرة زي اللي بالفيلم

ماعتقدش إن كان في موسيقى تصويرية مواكبة للأحداث أقدر أتكلم عنها ويمكن دي الحاجة الوحيدة اللي حسيت إنها طبيعية مع كمية التخبيط والرزع وانقلاب السيارات...

تقييمي للفيلم لا يتعدى 4/10 وبصراحة مش عارفة ليه إصلا اديته النسبة دي لغاية دلوقتي خاصة إنه يستحق أقل من كدا بكتير.

• 1 مفيد
• 0 غير مفيد