فى خيال كلا منا ديكور حياة يتمناها

ألو

أيوا

لو سمحت كنت حبة أعرف حفلة فيلم ديكور الساعة كام؟

فيه حفلة الساعة 7 والساعة 10 مساءًا.

تمام شكرًا.

ماماااااا يا مامااااا بصي فيه حفلة الساعة 7 والساعة 10 نروح أمتى؟

ماما: الساعة دلوقت 6 مش هنلحق خليها حفلة 10

تمام يا ماما

بعد ما خلصت مكالمة روحت جهزت وبعدين قولت أقف في الشباك شوية الجو كان ساقعة جدًا والقمر مكتمل والسحاب عامل دايرة حواليه كأنه بيحتفل بيوم اكتماله والقمر مبتسم ومكسوف والهوى بيحرك الشجر يمين وشمال كأنه بيرقصه المنظر كله بيحسسك براحة نفسية وبتتمنى أنك تطلع تقعد فوق أي سحابة وتشاركهم حفلة استقبال الشتا.

يلا يا بنتي أنا خلصت

يااه الوقت خدني، أنا جاية يا ماما أهو

نزلت أنا و ماما لابسين و متشيكين وروحنا السينما وقطعنا التذاكر وشربنا شاي سخن الأجواء كلها كانت محسساني أننا رايحين نحضر حفلة لأم كلثوم يوم الخميس من أول كل شهر، المود اللي كنت فيه كان مود رومانسى جدًا كنت حاسة أني رجعت لأيام الكلاسيكيات ولما دخلت الفيلم ومع أول ثانية فيه اتفاجئت بأنى جوا عالم الأبيض وأسود عالمي المفضل.

فى خيال كلا منا ديكور حياة يتمناها

فيلم ديكور بطولة خالد أبو النجا وحورية فرغلى وماجد الكدواني وتأليف محمد دياب وشيرين دياب ومدير تصوير الفيلم هو طارق حفني والانتاج لشركة نيو سينشرى أما مخرج الحالة الفنية ديه هو أحمد عبد الله السيد، وشارك الفيلم في عدة مهرجانات كمهرجان لندن السينمائي ومهرجان القاهرة السينمائي ومهرجان أيام قرطاج السينمائية، قصة الفيلم بتدور حول "مها " اللي بتعشق السينما وكمهندسة ديكور بقت خبيرة في إنها تخلق عوالم خيالية ومن كتر ضغط الشغل عليها بتتخيل عالم تاني هى موجودة فيه وطول الفيلم بنشوفها بتتنقل بين عالمين عالم مصطفى وعالم شريف، اللي واحد منهم متخيل والتاني من المفترض إنه واقعي.

حورية فرغلى بالنسبة ليا كان دورها مختلف جدًا حسيت إنها فنانة من زمن الفن الجميل وكأن فاتن حمامة قدامي برقتها فى الكلام وطريقة تمثيلها الواقعية وملابسها كمان حسيت في صوتها بالهدوء اللي يخليني أدخل جوا شخصيتها وأعيش معاها الحالة بسلاسة، وخالد أبو النجا أول ماشوفته جه في بالي أحمد رمزى وعمر الشريف حسيت أنه فتى الشاشة الأول كان ضايف للحالة الحس الرومانسي اليى كنا بنعيشه مع قصص حب أفلام زمان أما ماجد الكدواني كان مجموعة أحاسيس ماشية على الأرض تركيبة جميلة فكرني لما شوفته بحسين رياض في حنانه و طيبته أما وجود هاني عادل فى الفيلم كمغني خلاني أحس بالدفا في عز الشتا.

وعشان تحس بكل الأحاسيس اللى أنا حستها ديه كان للصورة دور مهم جدًا إنها تدخلك جوا حالة الفيلم من أول لحظة وده اللي نجح فيه مدير التصوير طارق حفني أنه يخلي الفيلم مصور بالأبيض والأسود في سنة 2014 ديه تجربة تستحق التأمل والمشاهدة ويمكن السبب في كون الفيلم أبيض وأسود إن شخصية مها من كتر عشقها لأفلام الأبيض الأسود وخصوصًا أفلام فاتن حمامة ده أثر عليها في رؤيتها للعالم بنظرة رومانسية خيالية بالأبيض والأسود.

وبقيت حاسة كمشاهدة إني بشوف فيلم لفاتن حمامة ومستنية عمر الشريف يظهر ويرقصوا مع بعض رقصة إيزيس وأوزوريس وكمان كل لقطة في الفيلم كأنها حالة مرسومة جوا لوحة ومتاخدة صورة فوتوغرافية وإحساسي بالصورة كان بيزيد تجلي مع الموسيقى اللي لعبت على وتر الحنين جوايا لزمن الكلاسيكيات.

الفيلم كله حالة عشناها وبنعيشها على أرض الواقع كتير مننا وقع فى اختيارات غلط وكتير مننا بقاله سنين لسه مش عارف يختار وكتير مننا بيفكر ينتحر عشان خايف من الاختيار وكتير مننا بنى حياة في خياله عشان يختار وفي النهاية بيبقى الاختيار متعلق لا طايل سما ولا أرض.

المخرج أحمد عبد الله السيد أقدر أقول عليه صانع المزيج العميق في فيلم ديكور.

تحية مني لكل أبطال العمل..

نقد آخر لفيلم ديكور

عنوان النقد اسم المستخدم هل النقد مفيد؟ تاريخ النشر
فى خيال كلا منا ديكور حياة يتمناها رغدة جلال الدين محمد فهمى  رغدة جلال الدين محمد فهمى 2/2 18 يناير 2015
الثورة مستمرة والماضي أيقونات ديكور abdullah shehata abdullah shehata 1/1 21 ديسمبر 2014
ما وراء الديكور dalia abdeldayem dalia abdeldayem 1/1 11 نوفمبر 2015
ديكور - عن الإختيارات الباكدج نتحدث Mostafa Elsafty Mostafa Elsafty 1/1 9 مارس 2015
دراما نفسية ....افسدتها حورية فرغلي محمد احمد محمد احمد محمد احمد محمد احمد 0/0 26 سبتمبر 2015